حصري: مراجعة العدد الاول من سلسلة String من شركة Mad Cave Studios

كوميك String من كتابة Paul Tobin و رسم Carlos Javier Olivares مع تلوين Sara Colella من دار نشر Mad Cave Studios الي مبدعه في اخر فترة في قصص مثل Dick Tracey, Flash Gordon و طبعًا Nottingham.

القصة عن شخصية Namgung Yoon-Sook (بسميها يون للاختصار) مستشارة لقسم الشرطة و الي عندها قدرة خارقة في انها تشوف خطوط وهمية بين شخصين الي يخليها غريبة الاطوار بين افراد الشرطة و يخليهم يتجنبون الشغل معها. يون تشوف نوعين من الخطوط، الازرق الي يكون بين شخصين بينهم علاقة حميمة، و الاسود الي يكون بين المجرم و المقتول.

القصة تبدأ في صفحتها الاولى نشوف فيها يون و زميلها الشرطي و قدامهم شخص لابس بدلة انتحارية، بعدها نرجع لقبل الحدث بـ ٨ ساعات، و نعرف اكثر عن يون و نتعرف على لوك، مهم جدًا نعرف ان لوك يستخدم بروناونز they/them و الي قتل حماسي للقصة، ما يحتاج اعرف هالخرابيط و انا في خامس صفحة، بس ما علينا نكمل نشوف القصة بتودي لوين، سون تبدأ تشرح قوتها للوك و تصير اشياء سخيفة جدًا مثل علاقات لوك و الخيانات و غيرها.

القصة القتل/الجريمة تأخذ وقت لين تبدأ، و اول ما تبدأ تنتهي بسرعة، لكن نهاية العدد نشوف خيط اسود طالع من سون نفسها.

بشكل عام القصة عادية بفكرة جيدة، الحوارات رديئة و مبتذلة، خصوصًا طريقة كلام المحقق لوك، الي تحسه مراهق عمره ١٧ اكثر من كونه محقق. الرسم كان ممتاز خصوصًا تعابير الوجه و الجسم، تفاصيل الخلفيات و الدمج بين البانلز في القصة. التلوين جيد و مناسب لأجواء القصة و لاهي غامقة مثل اغلب قصص المحققين و لا هي فاتحة بزيادة.

تصميم الشخصيات جدًا سيء، شعر يون من اكثر الاشياء الي تنرفز، لوك مافي اي شيء مميز في شكله ولبسهم مافيه شيء مميز، خصوصًا ان لبس يون قريب من لون شعرها، بس كاسرينه بحزام بني اكبر من جبهتها.

ادعمنا على Patreon !